今年NBA有8場季前賽喺海外打，周二雷霆同76人去到英國曼徹斯特獻技，仲吸引到一班英超球星入場睇波。近日盛傳英格蘭國家隊想招攬嘅紅魔新星贊奴沙，成為咗傳媒嘅焦點之一。睇佢全程有講有笑，好似冇俾阿仙奴中場韋舒亞狂插影響到心情喎！
除咗贊奴沙之外，紅魔仲有多名球星同名宿入場。老將里奧費迪南、門將迪基亞、中場費查、一代前鋒高爾同中場科東尼都有入場；里奧仲帶埋2012年因心臟病掛靴嘅前保頓中場梅姆巴入場，佢哋喺賽後仲同籃球名宿莫湯保同雷霆前鋒伊巴卡合照。曼聯呢邊勁人齊，反觀曼城就只有名宿、青年軍教練韋拉攜眷入場，睇嚟曼城班球員對籃球冇乜興趣喎。
18歲嘅贊奴沙都睇得好興奮，原本戴住一頂普通cap帽嘅佢，見到雷霆吉祥物走埋嚟合照嗰時，仲即時轉戴雷霆cap帽，認真識做。咁識做又好波，唔怪得咁多個國家都想搵佢加入佢哋嘅國家隊啦。

韋煙王：入選三獅唔使諗
不過，睇嚟贊奴沙想戴三獅「喼帽」都有一定難度，因為兵工廠小將韋舒亞日前話：「只有英格蘭人先可以入選三獅軍團，就算你喺英格蘭住夠5年，你都唔算係一個英格蘭人。」我求大俠覺得「韋煙王」就算冇指名道姓，但係都畫公仔畫到出腸，佢擺明唔妥英軍有意招攬贊奴沙啦。之後可能自知衰多口，喺twitter度話係俾傳媒砌生豬肉，佢意思其實係希望贊奴沙係英格蘭人。
講番比賽，76人一直領先，但係杜蘭特突然之間喺第3節攻入21分中嘅14分，形勢就咁逆轉，最後雷霆以103:99力克76人。不過，呢場始終都係季前賽，激烈程度係冇常規賽咁勁。雖然係咁，觀眾都好落力為兩隊打氣，令到杜蘭特賽後都話好高興可以喺英國球迷面前打波。

今日火箭鬥溜馬
海外季前賽今日去到亞洲，火箭將會喺菲律賓馬尼拉同溜馬比賽，到時球迷又可以見到林書豪啦！




來源:蘋果日報網站